بەشی پەیوەندییە گشتییەکان
دەروازەیەکی نوێ بۆ داهاتووت

چۆن بەشەکەم هەڵبژارد؟
سەرەتا ئامانجم پەیوەندییە سیاسییەکان بوو، بەڵام نمرەکەم کەمتر بوو بۆ وەرگرتنم تێیدا. دواتر گەڕام بۆ بەشی پەیوەندییە گشتییەکان و تێبینیم کرد لەم بەشەدا هەلی کارکردن بۆ ئامانجەکەم گونجاوە.

چی زانیارییەکم دەربارەی هەبوو؟
هەوڵمدا زانیاری وەربگرم لە ماڵپەڕی سۆشیال میدیای زانکۆی سلێمانی، بەڵام زۆر ڕوون نەبوو لام.

ئێستا چۆن لێی دەڕوانم؟
بەو شێوەیە لێی دەڕوانم کە داهاتوویەکی زۆر گەش لە بەردەممە، و سەرکەوتنێکی زۆر باشم دەبێت.

چی فێربووم؟
ئەم بەشە فێری هونەری پەیوەندیکردنمان دەکات بە شێوەیەکی ستراتیژی، و کاریگەریمان لە کۆمەڵگا و لە دامودەزگاکان و تێگەیشتنی وردمان لە جەماوەری دامەزراوەکە، واتە گوێگرێکی باش بوون.

چۆن بەشەکەم هەڵبژارد؟
ئەم بەشەم هەڵبژارد هەر لە قۆناغی ئامادەییەوە ئارەزووم لێی هەبووە، چونکە هەر زوو لە گرنگی ئەم بەشە تێگەیشتم لەبەر چەند هۆکارێک: ١- ئارەزوو دەکەم ببمە دەنگی کەسانی دیکە. ٢- ئارەزووی بزنسم هەیە و ئێرە بە بژاردەیەکی باش دەزانم.

چی زانیارییەکم دەربارەی هەبوو؟
نەمدەزانی خوێندنی ئەم بەشە لێرە چۆنە و وانەکانی چیین. لە ڕێگەی هاوڕێکەمەوە کەمێک زانیاری گشتیم وەرگرت، بەڵام بە تەواوی نا.

ئێستا چۆن لێی دەڕوانم؟
پێشتر چۆن سەیری بەشەکەمم دەکرد لە ڕووی گرنگییەوە، ئێستا زۆر زیاتر گرنگتر لێی دەڕوانم دوای ساڵێک خوێندن لە بەشەکە.

چۆن ئەم بەشەت هەڵبژارد؟
هەڵبژاردە نەبوو، بەڵکو ناوهاتنەوە بوو بەپێی نمرەکەم.

چی زانیارییەکت دەربارەی ئەم بەشە هەبوو؟
هیچ، بەهۆی تازەیی بەشەکە هیچ زانیارییەکی ئەوتۆم نەبووە لەسەری. بەڵام دواتر گەڕانم بۆ کرد و زانیاریم دەستکەوت.

ئێستا چۆن لێی ئەڕوانی؟
داهاتووی خۆمی لێدەبینم. ئەم بەشە دەرفەتی کارت پێدەدات، چ لە حکومەت یان کەرتی تایبەت، کە ئەگەر توانای تێدا بێت خۆت کاریگەری دەبێت.

چی فێربووی؟
گرنگی پەیوەندییە کۆمەڵایەتی و کەسییەکانمان، بایەخدان و برەودان بە پەیوەندییەکان.

چۆن بەشەکەت هەڵبژارد؟
سەرەتا لەبەر ئەوەی بەتەمای زانکۆی سلێمانی نەبووم، بۆخۆم هەر بە ئاسایی فۆڕمەکەم پڕکردەوە و لای ئیرادی ئەم بەشەم تێکرد، ئەگینا بە ویستی خۆم هەڵم نەبژارد.

چی زانیارییەکت دەربارەی هەبوو؟
لەبەر ئەوەی بەشەکە زۆر نوێ بوو، هیچ زانیارییەکی ئەوتۆم لەسەری نەبوو. بەڵام دوای ئەوەی ناوم لەو بەشە هاتەوە، لە زۆر سەرچاوەوە هەوڵمدا زانیاری لەسەری کۆبکەمەوە.

ئێستا چۆن لێی ئەڕوانی؟
بەڕاستی تاکە بڕیارە کە لە ژیانمدا یابێتم و لێی پەشیمان نەبووبێتمەوە. لەبەر ئەوەی من خۆم لەم بەشەدا دۆزییەوە، چونکە زۆر فراوانە و پەیوەندی زۆر باش لەگەڵ خەڵکدا دروست دەکەیت و بەشێکی وشک نییە. جگە لە هەمووی، هاوڕێیەتی بەڕاستی هاوڕێی زۆر باش و دڵسۆزم هەیە کە هەموو خەمخۆر و بەوەفان — لەبەر ئەوەش (خێزانی PR) بووە بە دروشمی بەشەکەمان.

چی فێربووی؟
فێری جۆرەها ڕێگا و شێواز بووم کە بتوانم پەیوەندی پێ ببەستم و کاریان پێ بکەم.

چۆن بەشەکەت هەڵبژارد؟
کاتێک زانیم کە بەشەکە پەیوەندی بە کۆمەڵگا و ژیانی ڕۆژانەوە هەیە و ئەو شتانەی کە ڕوودەدەن و ئەگەری ڕووداندنی هەیە لە داهاتوودا، پێشبینیکردنی بۆ ڕووداوەکانی کۆمەڵگا، زیاتر خولیام هەبوو بۆ بەشەکە و ویستم پەرە بەو بوارە بدەم چونکە خۆم حەزم لە پیشەیەکی لەو جۆرە بووە، هەستم دەکرد خۆم لەو بەشە دەبینمەوە.

چی زانیارییەکت دەربارەی هەبوو؟
سەرەتا هیچ زانیارییەکم نەبوو، بەحوکمی ئەوەی بەشەکە بەشێکی تازە بوو. پرسیارم کرد و هەندێک مامۆستا یارمەتیان دام، دواتر کە بۆم ڕوون بووەوە بەبێ هیچ دوودڵییەک لە یەکەم بەشی فۆڕمەکەمم دانا. دواتر سێرچم بۆی کرد و زانیاری زیاترم دەربارەی بەشەکە زانی کە پەیوەندی بە حکومەت و سیاسەت و کەرتی تایبەت و گشتی و کۆمپانیا و دامەزراوەکانەوە هەیە. زیاتر خولیای کارە سیاسییەکانم هەبوو، دواتر دڵنیایی تەواوم وەرگرت کە بەشێکی تەواو سەرکەوتووە.

ئێستا چۆن لێی ئەڕوانی؟
ئێستا وەک بەشێکی سەرکەوتوو، بەشێکی زۆر باش لێی دەڕوانم. هیچ پەشیمان نیم لە هەڵبژاردنی بەشەکەم و زۆر حەزم لێیەتی، هیواداریشم زیاتر پەرەی پێ بدرێت لە ساڵانی داهاتوودا.

چی فێربووی؟
زۆر شت لەم بەشەدا فێربووم — فێری ئیدارەدانی وێنەی زەینی و دروستکردنی ناوبانگی باش و شیکاری جەماوەر و ئیدارەدانی قەیران و پێشبینیکردن و بەرەنگاربوونەوە و داڕشتنی پەیامی ستراتیژی و میدیایی و ڕووبەڕووبوونەوەی پڕوپاگەندە و هtd. بە کورتی زۆر شتی باش لەم بەشەدا فێربووم و ڕۆژ بە ڕۆژ زیاتر خولیام بۆ بەشەکە و زانیاریەکانی مامۆستا ئازیزەکان زیاتر دەبێت. فێربووم کە پەیوەندییە گشتییەکان پردێکە لە نێوان ڕێکخراو و کۆمەڵگەدا، فێربووم چۆن بە شێوازێکی زانستی و ئەخلاقی ئەم پردە بپارێزم.

چۆن بەشەکەت هەڵبژارد؟
سەرەتا زانیارییەکی زۆرم نەبوو لەسەری، بەڵام بەشی پەیوەندییە گشتییەکانم وەک پردێکی سەرەکی لە نێوان ڕێکخراو، کۆمپانیا و جەماوەردا بینیوە. حەز و ئارەزووی خۆمم لە کارامەییەکانی پەیوەندیکردن و بەڕێوەبردنی قەیرانەکاندا دۆزییەوە.

چی زانیارییەکت هەبوو لەسەر بەشەکە؟
تەنها تێڕوانینێکی گشتیم هەبوو کە بۆ ڕیکلام و ڕەنگدانەوەی کارەکان بەکاردێت.

ئێستا چۆن بەشەکەت دەبینی؟
ئێستا بەشەکەم بە یەکێک لە ستوونە سەرەکی و ستراتیژییەکانی هەر سەرکەوتنێک دەبینم. تێگەیشتووم کە پەیوەندییە گشتییەکان تەنها وەڵامدانەوەی ڕووداوەکان نییە، بەڵکو پلاندانانی پێشوەختەیە بۆ پاراستنی ناوبانگ و دروستکردنی بەهای درێژخایەن بۆ دامەزراوەکە.

چی فێربووی؟
توانای گوێگرتنی چالاک و شیکردنەوەی بۆچوونی جەماوەر. فێربووم چۆن پەیامێکی ڕوون، کاریگەر و متمانەپێکراو بگەیەنم و وێنەی ڕاستەقینەی دامەزراوەکە پیشان بدەم.

چۆن بەشەکەم هەڵبژارد؟
بەهۆی حەز و خولیای بەهێزم بۆ دروستکردنی پەیوەندی کۆمەڵایەتی، ڕاگەیاندن و تێگەیشتن لە ڕای گشتی ئەم بەشەم هەڵبژارد، وەک دەرفەتێک بۆ ئەوەی بە شێوازێکی زانستی بوارەکانی ڕێکخستنی کارگێڕی، پرۆتۆکۆڵ و بەڕێوەبردنی کەشوهەوای دەزگایی فێربم.

چی زانیارییەکم دەربارەی هەبوو؟
زانیارییە سەرەتاییەکانم کورت بوون، بەڵام خاوەنی چەند هاوڕێیەک بووم لەم بەشە کە یارمەتیدەرێکی زۆر باش بوون بۆ زیادکردنی زانیارییەکانم سەبارەت بەوەی کە پەیوەندییە گشتییەکان پردی پەیوەندی نێوان ڕێکخراو و جەماوەرەکەیەتی، هەروەها دەمزانی بەشێکە لە بوارە گرنگەکانی میدیا و بەڕێوەبردن کە یارمەتی دروستکردنی وێنەی ئەرێنی کۆمپانیا و دامەزراوەکان دەدات.

ئێستا چۆن لێی ئەڕوانم؟
ئێستا بەشەکە بە زۆر فراوانتر و گرنگتر دەبینم لە تەنها بەڕێوەبردنی ئاسایی، وەک هونەر و زانستێکی ستراتیژی لێی دەڕوانم بۆ بەڕێوەبردنی قەیرانەکان، دروستکردنی ناوبانگی ڕێکخراوەیی و هەماهەنگی پرۆتۆکۆڵی و ڕێکخستنی چالاکییەکان.

چی فێربووم؟
فێری تیۆرەکانی پەیوەندیکردن، ستراتیژییەکانی بەڕێوەبردنی قەیران، بەڕێوەبردنی هەڵمەتە ڕاگەیاندنییەکان و کارامەییەکانی پێشکەشکردن بووم، لەگەڵ ئەوەشدا فێری دروستکردنی ناوەڕۆکی میدیایی بەهێز و تێگەیشتن لە بنەماکانی ڕەفتاری جەماوەر بووم.

چۆن بەشەکەم هەڵبژارد؟
چونکە بەشێکی تازە بوو، سەرنجی ڕاکێشام؛ حەزم کرد بوارێکی نوێ تاقیبکەمەوە کە تێکەڵەیەکە لە پەیوەندی کۆمەڵایەتی، ڕێکخستن و ڕاگەیاندن.

چی زانیارییەکم دەربارەی هەبوو؟
تەنها تێگەیشتنێکی سەرەتایی؛ کە بەشێکە بۆ ڕێکخستنی وێنەی دامەزراوەکان و دروستکردنی پردی پەیوەندی لەگەڵ خەڵکدا.

ئێستا چۆن لێی دەڕوانم؟
بە بەشێکی ستراتیژی و گرنگی دەبینم کە هیچ کۆمپانیا یان دامەزراوەیەک ناتوانێت بێ ئەوە سەرکەوتوو بێت.

چی فێربووم؟
فێری هونەری گفتوگۆ، بەڕێوەبردنی بۆنە و ئیڤینتەکان، و پرۆتۆکۆڵ بووم.

چۆن بەشەکەت هەڵبژارد؟
ڕەفیقێکم لەو بەشە بوو، منیش بەهۆی ئەوەوە هەڵمبژارد.

چی زانیارییەکی دەربارەی هەبوو؟
هیچ زانیارییەکی سەرەتایم نەبوو، تەنها ئەوەنەم دەزانی زۆرینەی بابەتەکان بە کوردی دەخوێندرێن.

ئێستا چۆن لێی دەڕوانم؟
بەشێکی تازەیە و تا ئێستا زۆر ناسراو نییە لە ناو دامەزراوە و کۆمەڵگا.

چی فێربووم؟
باشترکردنی پەیوەندی نێوان دامەزراوە و جەماوەر و چەندان شتی دیکە.

چۆن بەشەکەت هەڵبژارد؟
بەشەکەم هەڵبژارد چونکە حەزم لە پەیوەندی‌کردن لەگەڵ خەڵک و کارکردن لە بواری میدیا و ڕێکخستنە.

چی زانیاریت دەربارەی هەبوو؟
پێش ئەوەی بچمە بەشەکە، زانیاریم هەبوو کە پەیوەندییە گشتییەکان بە پەیوەندی لەگەڵ خەڵک، میدیا و بەڕێوەبردنی وێنەی دامەزراوەکانەوە پەیوەندی هەیە.

ئێستا چۆن لێی دەڕوانێت؟
ئێستا بەشەکەم بە گرنگتر و فراوانتر دەبینم و باوەڕم وایە بوارێکی گرنگە بۆ دامەزراوە و کۆمپانیاکان.

چی فێربووی؟
فێربووم چۆن پەیوەندییەکی کاریگەر لەگەڵ خەڵک دروست بکەم، کێشەکان چارەسەر بکەم، کار بە تیم بکەم و ڕێکخستنی بۆنە و چالاکییەکان بکەم.

چۆن بەشەکەت هەڵبژارد؟
حەزی زۆرم بۆ کاری سیاسی هەبوو دەمویست بزانم کەسایەتیە سیاسیەکان چۆن دەتوانن کاریگەری بخەنە سەر ڕای گشتی و جەماوەر بەچی ڕێگایەک تا زانیم لە ڕێگای کەسانی پەیوەندییە گشتیەکانەوە ئەو کاریگەریە دروستدەکەن.

چی زانیاریەکت دەربارەی هەبوو؟
تەنها ئەوەندەم دەزانی کە کەسایەتیە سیاسیەکان تیمیان هەیە بۆ ئەوەی وتارو دەرکەوتنیان لە میدیاکانەوە ڕێکبخەن نەم دەزانی ئەم بەشە هێندە قوڵە پشتی بە توێژینەوەی دەرووناسی خەڵک بەستوە بۆ بەدەستهێنانی متمانە.

ئێستا چۆن لێی دەڕوانی؟
ئێستا بە سەرەکیترین هۆکاری سەرکەوتنی هر کارێکی سیاسی دەیبینم.

چی لێ فێربووی؟
بەڕێوە بردنی کەمپەینی هەڵبژاردن و نوسینی گوتاری سیاسی ، کۆنتڕۆڵکردنی قەیرانە سیاسیەکان وپاراستنی ناوبانگ ، شێوازی قسەکردن لە میدیاو کۆنگرەی ڕۆژنامەوانی ، توێژینەوە.